ଭୁବନେଶ୍ୱର: କୋରାପୁଟର କଂଗ୍ରେସ ବିଧାୟକ କୃଷ୍ଣଚନ୍ଦ୍ର ଶଗରିଆ ଆଜି ତାଙ୍କ ବିଧାୟକ ପଦବିରୁ ଇସ୍ତଫା ଦେଇଛନ୍ତି। ଭୁବନେଶ୍ୱରଠାରେ ବାଚସ୍ପତି ପ୍ରଦୀମ ଅମାତଙ୍କୁ ଭେଟି ଶ୍ରୀ ଶଗରିଆ ନିଜ ଇସ୍ତଫା ପତ୍ର ପ୍ରଦାନ କରିଛନ୍ତି। ବିଧାନସଭାରେ ପ୍ରଚଳିତ ଅାଇନ ଅନୁସାରେ ସେ ନିଜର ହାତଲେଖା ଇସ୍ତଫା ପତ୍ର ବାଚସ୍ପତିଙ୍କୁ ହସ୍ତାନ୍ତର କରିଛନ୍ତି। ଏଥିସହ କଂଗ୍ରେସରେ ରହି ପୂର୍ବ ଭଳି କାର୍ଯ୍ୟ କରିବେ ବୋଲି ସୂଚନା ଦେଇଛନ୍ତି।
ସୂଚନାଯୋଗ୍ୟ କି, କଂଗ୍ରେସ ବିଧାୟକ କୃଷ୍ଣ ସଗରିଆ ଗତ ୩୦ ତାରିଖରେ ଇସ୍ତଫା ଦେବା ନେଇ ପ୍ରେସମିଟରେ ଘୋଷଣା କରିଥିଲେ । କୁନ୍ଦଲି ଗଣଦୁଷ୍କର୍ମ ଓ ଆତ୍ମହତ୍ୟା ଘଟଣାରେ ପୀଡିତାଙ୍କୁ ସେ ନ୍ୟାୟ ଦେଇପାରି ନ ଥିବାରୁ ବିବେକ ଡାକରାରେ ଇସ୍ତଫା ଦେବାକୁ ନିଷ୍ପତି ନେଇଥିବା ପ୍ରକାଶ କରିଥିଲେ । ତେବେ ବାଚସ୍ପତି ଅନୁପସ୍ଥିତ ରହିଥିବାରୁ ନଭେମ୍ବର ୬ରେ ସେ ବାଚସ୍ପତିଙ୍କୁ ସାକ୍ଷାତ କରିବା ନେଇ ସୂଚନା ଦେଇଥିଲେ ।