ପିପିଲି : ସରକାରୀ ବିଦ୍ୟାଳୟର ପ୍ରଧାନ ଶିକ୍ଷକ କରୁଛନ୍ତି ରାଜନୀତି । ସରକାରୀ ଚାକିରୀ ରେ ଥାଇ ମଧ୍ୟ ଯୋଗଦେଇଛନ୍ତି ଏକ ନିର୍ଦ୍ଧିଷ୍ଟ ରାଜନୈତିକ ଦଳରେ । ଯାହାକୁ ନେଇ ଦେଖା ଦେଇଛି ବିବାଦ । ସମ୍ପୃକ୍ତ ପ୍ରଧାନ ଶିକ୍ଷକଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ଗ୍ରାମବାସୀ ।
ପିପିଲି ବ୍ଳକ ଅଧିନ ରୂପଦେଇପୁର ପଂଚାୟତ ନାହାମଙ୍ଗ ପାଟଣା ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ହିମାଂଶୁ ଶେଖର ନାୟକଙ୍କ ନାମରେ ଆସିଛି ଏଭଳି ସାଂଘାତିକ ଅଭିଯୋଗ । ରାଜ୍ୟ ସରକାରଙ୍କ ଚାକିରୀରେ ଥାଇ ସରକାରୀ ବେତନ ନେଉଥିଲେ ମଧ୍ୟ ବିଜେପି ଭଳି ଏକ ନିର୍ଦ୍ଦିଷ୍ଟ ରାଜନୈତିକ ଦଳରେ ସେ ଯୋଗ ଦେଇଥିବା ଅଭିଯୋଗ ହୋଇଛି । ସୋସିଆଲ ମିଡ଼ିଆରେ ସେ ବିଜେପି ରେ ଯୋଗ ଦେଇଥିବା ସମୟର ଫଟୋ ଭାଇରାଲ ହୋଇଛି । ଯେଉଁଥିରେ ସେ ବେକରେ ବିଜେପି ଉତରୀୟ ପକାଇଥିବା ବେଳେ ଫୁଲମାଳ ମଧ୍ୟ ପକାଇଛନ୍ତି । କେନ୍ଦ୍ର ପେଟ୍ରୋଲିୟମ ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ କରମର୍ଦନ କରିବା ସହ ହସି ହସି ମଂଚରୁ ତଳକୁ ଓହ୍ଲାଉଥିବା ଫଟୋ ବି ପୋଷ୍ଟ ହୋଇଛି । ତେବେ ବିଜେପି ରାଜ୍ୟ କାର୍ଯ୍ୟଳୟରେ ଅନୁଷ୍ଠିତ ଏକ ମିଶ୍ରଣ ପର୍ବରେ ସେ ଯୋଗ ଦେଇଥିବା ଅନୁମାନ କରାଯାଉଛି । ତେବେ ଜଣେ ସରକାରୀ କର୍ମଚାରୀ ହୋଇ ଏକ ନିର୍ଦ୍ଦିଷ୍ଟ ରାଜନୈତିକ ଦଳରେ ପ୍ରଧାନ ଶିକ୍ଷକଙ୍କ ଯୋଗଦାନକୁ ନେଇ କ୍ଷୁବ୍ଧ ହୋଇଛନ୍ତି ଗ୍ରାମବାସୀ । ଏନେଇ ବ୍ଲକ ଶିକ୍ଷାଧିକାରୀଙ୍କ ନିକଟରେ ଗ୍ରାମବାସୀଙ୍କ ପକ୍ଷରୁ ଏକ ଅଭିଯୋଗ ପତ୍ର ଦାଖଲ ହୋଇଛି । ଯେଉଁଥିରେ ଦର୍ଶାଯାଇଛି ସମ୍ପୃକ୍ତ ପ୍ରଧାନ ଶିକ୍ଷକ ବିଜେପିରେ ଯୋଗଦେବା ପରେ କିଛି ଗ୍ରାମବାସୀଙ୍କୁ ବିଜେପିରେ ଯୋଗଦେବା ପାଇଁ ପ୍ରବର୍ତାଇ ଥିଲେ । ଏଥିରେ ସଫଳ ନହେବାରୁ ଗୁ୍ଣ୍ଡ ଲଗାଇ ମାଡ଼ ମାରିଥିବାର ଅଭିଯୋଗ ହୋଇଛି । ସୂଚନାଯୋଗ୍ୟ ପ୍ରଧାନ ଶିକ୍ଷକ ହିମାଂଶୁ ନାୟକ ଓ ସରକହାରୀ ଶିକ୍ଷକ ରାଧାନାଥ ଦାସ ବିଦ୍ୟାଳୟକୁ ନିୟମିତ ଭାବରେ ବିଳମ୍ବରେ ଆସୁଥିବା ନେଇ ବାରମ୍ବାର ଅଭିଯୋଗ ହେବା ପରେ ବ୍ଲକ ଶିକ୍ଷାଧିକାରୀ ପ୍ରମୋଦ ପରିଡ଼ା ଘଟଣାସ୍ଥଳ ପରିଦର୍ଶନ କରି ସରଜମିନ ତଦନ୍ତ କରିଥିଲେ । ଶିକ୍ଷକ ମାନେ ନିୟମିତ ଆସିବା ସହ ବିଦ୍ୟାଳୟ ପରିସରକୁ ଶୃଙ୍ଖଳିତ ରଖିବା ପାଇଁ ଶିକ୍ଷକ ମାନଙ୍କୁ ତାଗିଦ୍ କରିଥିଲେ । ସେହିଭଳି ପୁନର୍ବାର ଏଭଳି ଅଭିଯୋଗର ସତ୍ୟସତ୍ୟ ପାଇଁ ଫଟୋ କିମ୍ବା ଭିଡ଼ିଓ ରେକର୍ଡିଙ୍ଗ ରଖିବା ପାଇଁ ଗ୍ରାମବାସୀଙ୍କୁ କହିଥିଲେ । ତେବେ ଗତ ୪ତାରିଖରେ ଶିକ୍ଷକ ଦ୍ୱୟ ବିଳମ୍ବରେ ଆସିଥିବା ବେଳେ ଗ୍ରାମର କିଛି ଯୁବକ ସ୍କୁଲ କ୍ୟାମ୍ପସ୍ରେ ଭିଡ଼ିଓ ସୁଟିଙ୍ଗ୍ କରିଥିଲେ । ଉକ୍ତ ସମୟରେ ସ୍କୁଲ ପରିଚାଳନା କମିଟି ଅଧ୍ୟକ୍ଷ କୁଶ ମଳିକ ଓ ସଭ୍ୟ କାହ୍ନୁ ମଳିକ ଭିଡ଼ିଓ ଉତଳୋନ କରୁଥିବା ଯୁବକଙ୍କୁ ବିରୋଧ କରିବା ପରେ ଗଣ୍ଡଗୋଳର ସୂତ୍ରପାତ ହୋଇଥିଲା । ଯାହାକୁ କେନ୍ଦ୍ର କରି ବଳଙ୍ଗା ଥାନାରେ ୧୦୯/୧୮ ଓ ୧୧୦/୧୮ରେ ଦୁଇ ମାମଲା ରୁଜୁ ହୋଇଛି ।
ସୂଚନା ଯୋଗ୍ୟ କୌଣସି ସରକାରୀ କର୍ମଚାରୀ କିମ୍ବା ଶିକ୍ଷକ, ଅଧ୍ୟାପକ ମାନେ ସିଧାସଳଖ ରାଜନୈତିକ ଦଳରେ ଯୋଗଦେବା ଅବା ରାଜନୈତିକ ସଭା ସମିତି, ଶୋଭାଯାତ୍ରା କିମ୍ବା ଦଳୀୟ କାର୍ଯ୍ୟକ୍ରମରେ ସାମିଲ ହେବା ନେଇ କଟକଣା ରହିଛି । ଏପରିକି ୨୦୧୧ ନଭେମ୍ବର ୨୩ରେ ନାଗପୁର ଜିଲ୍ଲାର ନୂତନ ଆଦର୍ଶ ଜୁନିୟର କଲେଜର ଅଧ୍ୟାପକ ଶ୍ରୀକାନ୍ତ ପାଣ୍ଡେକୁ ବିଜେପିରେ ଯୋଗଦେଇ ଥିବା ଅଭିଯୋଗରେ ନିଲମ୍ବନ କରାଯାଇଥିବା ବେଳେ ବମ୍ବେ ହାଇକୋର୍ଟରେ ଏହାକୁ ଚ୍ୟାଲେଞ୍ଜ କରାଯାଇଥିଲା । ଜଷ୍ଟିସ୍ ପି.ବି ମଜୁମଦାର ଓ ଜଷ୍ଟିସ୍ ପି.ବି ଭାରାଲେଙ୍କ ଦ୍ୱାରା ଗଠିତ ନାଗପୁର ବେଂଚ୍ ଏହି ପିଟିସନକୁ ଖାରଜ କରିବା ସହ ଚାକିରୀରେ ଥିବା ପର୍ଯ୍ୟନ୍ତ କୌଣସି ସରକାରୀ କର୍ମଚାରୀ ରାଜନୈତିକ ଦଳରେ ଯୋଗ ଦେବା ଆବଶ୍ୟକ ନାହିଁ ବୋଲି ଖଣ୍ଡପୀଠ କହିଥିଲେ । ଏହା ଦ୍ୱାରା ଶୈକ୍ଷିକ ବାତାବରଣ ପ୍ରଭାବିତ ହେବା ସହ ଶିକ୍ଷାଦାନ ବାଧାପ୍ରାପ୍ତ ହେବ ବୋଲି ଖଣ୍ଡପୀଠରେ ମତ ରଖିଥିଲେ । ସେହିଭଳି ସରକାରୀ କର୍ମଚାରୀ (ଉଭୟ ରାଜ୍ୟ ଓ କେନ୍ଦ୍ର ବେତନଭୋଗୀ) ରାଜନୈତିକ ଦଳରେ ସାମିଲ ହେବା ଗ୍ରହଣୀୟ ନୁହେଁ ବୋଲି ମାଡ଼୍ରାସ ହାଇକୋର୍ଟ ବେଂଚ ୨୦୧୦ରେ ଏକ ଶୁଣାଣିରେ କହିଥିଲେ । ଏପରିକି ଏହା ଦ୍ୱାରା ସମ୍ପୃକ୍ତ ବ୍ୟକ୍ତିର ସାମ୍ବିଧାନିକ ଅଧିକାର କ୍ଷୁର୍ଣ୍ଣ ହେବ ନାହିଁ ବୋଲି ମଧ୍ୟ ଖଣ୍ଡପୀଠ ମତ ରଖିଥିଲେ । ଖଣ୍ଡପୀଠ କହିଥିଲେ ଦେଶର ସେବା କରିବା ପାଇଁ ଇଚ୍ଛୁକ ବ୍ୟକ୍ତି ସରକାରୀ ଚାକିରୀରୁ ବାହାରି ଯାଇ ରାଜନୀତି କରିପାରିବେ । କିନ୍ତ୍ୁ ଚାକିରୀରେ ଥାଇ ରାଜନୈତିକ ଦଳରେ ଯୋଗ ଦେବା ଦ୍ୱାରା କର୍ମ କ୍ଷେତ୍ର ପ୍ରଭାବିତ ହେବ ବୋଲି ଖଣ୍ଡପୀଠ ଆଶଙ୍କା ବ୍ୟକ୍ତ କରିଥିଲେ । ଅଲ ଇଣ୍ଡିଆ ସର୍ଭିସ କଣ୍ଡକ୍ଟ ରୁଲସ୍ ୧୯୬୮ର ରୁଲ-୫ ଅନୁସାରେ ଆଇ.ଏ.ଏସ ମାନେ ରାଜନୈତିକ ଦଳରେ ଯୋଗ ଦେଇପାରିବେ ନାହିଁ । ସେହିଭଳି ସେଂଟ୍ରାଲ ସିଭିଲ ସର୍ଭିସ କଣ୍ଡକ୍ଟ ରୁଲ ୧୯୬୪ ରେ ମଧ୍ୟ ଏନେଇ ଉଲ୍ଲେଖ ରହିଛି । ନାହାମଙ୍ଗ ପାଟଣା ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ହିମାଂଶୁ ନାୟକ ନିର୍ଦ୍ଦିଷ୍ଟ ରାଜନୈତିକ ଦଳରେ ଯୋଗ ଦେବା ଅଭିଯୋଗ ଓଡ଼ିଶା ସରକାରଙ୍କ ଶିକ୍ଷା ବିଭାଗରେ ଏକ ବିରଳ ଅଭିଯୋଗ ବୋଲି ମତପ୍ରକାଶ ପାଇଛି । ତେବେ ବ୍ଲକ ଶିକ୍ଷାଧିକାରୀ ଗ୍ରାମବାସୀଙ୍କ ଅଭିଯୋଗ ପତ୍ରକୁ ଜିଲ୍ଲା ଶିକ୍ଷାଧିକାରୀଙ୍କ ପାଖକୁ ପଠାଇ ଥିବା ଜଣାପଡ଼ିଛି ।