ଭୁବନେଶ୍ୱର: ବିଳମ୍ବିତ ରାତିରେ ରାଜଧାନୀର ବିଭିନ୍ନ ଡ୍ୟାନ୍ସ ବାର୍ ଉପରେ ପୁଲିସର ଚଢ଼ଉ ଜାରି ରହିଛି। ଗତ ୨ ଦିନ ମଧ୍ୟରେ ରାଜଧାନୀର ବିଭିନ୍ନ ବାର୍ ଉପରେ ଚଢ଼ଉ କରାଯାଇ ମୋଟ ୨୦ଜଣ ଯୁବତୀଙ୍କୁ ଉଦ୍ଧାର କରାଯାଇଛି। ଗତ ଶୁକ୍ରବାର ଦିନ ଖାରବେଳନଗର ଥାନା ଅଧୀନରେ ଥିବା ସୋଲାଲ-ଇନ୍ ବାର୍ରେ ଚଢ଼ଉ କରି ପୁଲିସ ସେଠାରୁ ୧୦ଜଣ ଯୁବତୀଙ୍କୁ ଉଦ୍ଧାର କରିଥିଲା।ସେହିପରି ଗତକାଲି ଅର୍ଥାତ୍ ଶନିବାର ରାତିରେ ସ୍ପେଶାଲ ସ୍କ୍ୱାଡ୍ ଓ ଲକ୍ଷ୍ମୀସାଗର ଥାନା ପୁଲିସ ରେନ ଦ ବାର୍, କଳ୍ପନାଠାରେ ଥିବା ଦୀପାଳି ଓ ବାପୁଜୀ ନଗରର ଓଇସ ବାର୍ରେ ଅତିର୍କିତ ଚଢ଼ଉ କରି ମୋଟ ୧୦ଜଣ ଯୁବତୀଙ୍କୁ ଉଦ୍ଧାର କରିଛି। ବିନା ଅନୁମତିରେ ବିଳମ୍ବିତ ରାତି ଯାଏଁ ବାର୍ ଚଳାଇବା ଓ ଯୁବତୀମାନଙ୍କୁ ଅଶ୍ଳୀଳ ନୃତ୍ୟ କରାଇବା ଅଭିଯୋଗରେ ସମସ୍ତଙ୍କୁ ସର୍ଟ-ଷ୍ଟେ ହୋମ୍କୁ ପଠାଇଛି। ସେହିପରି ଅଟକ ବାର୍ କର୍ମଚାରୀ ଓ ମ୍ୟାନେଜର୍ଙ୍କୁ ପଚରାଉଚାର କରାଯାଉଛି।